នាយករដ្ឋមន្ត្រីប្រាប់ពីគុណសម្បត្តិកម្ពុជាចំនួន ៥ចំណុចដែលការពារនិងផ្ដល់ភាពងាយស្រួលដល់អ្នកវិនិយោគ
ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានប្រាប់ទៅក្រុមធុរៈកិច្ចចិនថាប្រទេសកម្ពុជាស្វាគមន៍រាល់អ្នកវិនិយោគទាំងអស់មកបណ្ដាក់ទុន និងថាការវិនិយោគនៅកម្ពុជាគឺធានាបានការការពារ និងផ្ដល់ភាពងាយស្រួលដល់អ្នករកស៊ីទាំងអស់ផងដែរ។
តំណាងក្រុមហ៊ុនវិនិយោគចំនួនបីដែលដឹកនាំដោយឧកញ៉ា ចេន ហ្ស៊ី បានចូលជួបនាយករដ្ឋមន្ត្រីកម្ពុជានាទីស្ដីការគណៈរដ្ឋមន្ត្រីនាព្រឹកថ្ងៃទី២៥ ខែមេសា ឆ្នាំ២០២២នេះ ដោយបានជម្រាបសម្ដេចតេជោពីអាជីវកម្មរបស់ក្រុមហ៊ុនទាំង ៣ដែលមានបំណងវិនិយោគនៅកម្ពុជាដែលសុំស្វែងយល់ពីឱកាសវិនិយោគនៅកម្ពុជា។
ជាមួយប្រតិភូអ្នកវិនិយោគមកពីក្រុមហ៊ុនចំនួនបីរបស់ចិនដែលដឹកនាំដោយលោកឧកញ៉ា ចេន ហ្ស៊ី នៅទីស្ដីការគណៈរដ្ឋមន្ត្រីនាព្រឹកនេះ សម្ដេចតេជោ ហ៊ុន សែន បានប្រាប់ដល់តំណាងក្រុមហ៊ុនទាំងនោះថាបរិយាកាលវិនិយោគនៅកម្ពុជាមានភាពល្អប្រសើរដោយសារកត្តា៥ចំណុចដែលរួមមាន សន្ដិភាព ច្បាប់វិនិយោគដែលផ្ដល់ភាពងាយស្រួលដល់ការវិនិយោគ កម្ពុជាមានប្រព័ន្ធច្រកចេញចូលតែមួយសម្រាប់ជួយសម្រួលដល់អ្នកវិនិយោគ មិនមានការហាមប្រាមការប្រើប្រាស់រូបិយប័ណ្ណបរទេសក្នុងការបើកប្រាក់ខែដល់បុគ្គលិក និងកម្ពុជាមានកម្លាំងពលកម្មវ័យក្មេងច្រើន។
ក្រុមហ៊ុនទាំង៣ដែលចង់មកវិនិយោគនៅកម្ពុជានោះមាន ក្រុមហ៊ុនChina Investment ក្រុមហ៊ុន Easter និងក្រុមគូអាន ដែលក្រុមហ៊ុនទាំងបីនេះធ្វើអាជីវកម្មលើវិស័យឧស្សាហកម្មរ៉ែ ហេដ្ឋារចនាសម្ព័ន្ធ អចលនវត្ថុ សំណង់ ដឹកជញ្ជូន និងពាណិជ្ជកម្មមូលប័ត្រ។
សម្ដេចតេជោ ហ៊ុន សែន បានណែនាំដល់ក្រុមហ៊ុនទាំង៣ស្វែងបន្ថែមជាមួយក្រុមប្រឹក្សាអភិវឌ្ឍន៍កម្ពុជា អំពីព័ត៌មានលំអិតនៃទិសដៅវិនិយោគនៅកម្ពុជា៕